Vyhľadávací formulár

Aposol 8

Saolo Igarung Di Tooltool Yo Tiportak Lodi Pang Yesu Nga

1Saolo la imalum pang di tooltool tina yo tikatmata Tepan a imata i, le ikamata ngan dook mata. Le ye ke tani in nga, ngan timadit a be tigarung di tooltool kapala le imot yo tigaua ye bareme ke Yesu a tiyepe ye malala mai Yerusalem, ngan lapau. Le nga titattadai a timagirigiri, inbe tikoo le la tiyepe kidi kidi ye tana mai kidi Yudia le Samaria. Inbe Yesu di aposol ki leu la sila tiyepe Yerusalem nga. 2Ngan le di tooltool kapala yo titoo dada le momo dook mata ke Maro yo lono panga nga, ngan la man tikaua Tepan tani in bobono a la titang ye, inbe tikauu la tikelmaii. 3Bong Saolo tani in imadit ye garungunu di tooltool yo tigaua ye bareme ke Yesu nga. Le nga ipa a ila ye rumu tina yo atu atu nga, inbe ikap di tooltool tina ngan tamoto le garup, a iyololo di la itar di lo rumu dook tiap kidi talnga dikidiki lono.

Pilip Iraia Bingi Dook Mata Pang Di Tooltool Ke Samaria

4Di tooltool tina yo timagirigiri inbe tikoo a la tiyepe kidi kidi ye tana kapala nga, ngan tipa a tiraia bingi dook mata pang di tooltool ke malala tina yo tila ye nga. 5Ngan Pilip lapau idu pang ye malala mai atu kidi Samaria du iraia bingi dook mata ke Kirisi pang di tooltool nango. 6Ngan ye kene tani in, di tooltool malala mai la tilongo betanga ke Pilip, inbe tikamata mos yo iyei a iyei ben tarkilanga panga nga, le nga di le imot tila potai ye la titar talngadi be tilongo betanga ki tina yo iwetewete ye nga. 7Inbe di tooltool tina tikamata Pilip tani yo inganga di so sadi a tikoo ye di tooltool alunu nga, ngan le di so sadi tina ngan koodi welewele, inbe tiyege di tooltool tina ngan a tikoo. Inbe ikarata di tooltool alunu yo baedi le kedi kap rama nga, inbe di kapala yo kedi ikalel nga, ngan le di le imot tinidi dook mata mulu. 8Le di tooltool ke malala mai tani in tikamata so tina yo pombe nga, ngan nen le di le imot lodi ponana mai san.

Tool Pidipidana Atu Ene Simon

9Ngan tool atu yo iyepe ye malala mai tani lapau i, in ene la Simon i. Ya in muku ngan iyei gogo bar matana matana ke pidipidi, a di tooltool le imot ke Samaria tikamata, ngan le titakrai ye. Inbe ya taunu ipayiti a iwete be ya in tool mai. 10Ngan tina nen nga, le nga di tooltool yo edi maimai tiye di tooltool sokorai kapala nga, ngan di le imot tipa le tila potai ye Simon a la tilongo betanga ki. Inbe tiyei ne, “Ai, gurana ke Maro yo tiweta ye Gurana Mai i, in naii la iken ye tool i.” 11Le nga di tooltool tina ngan di le imot titoo Simon tani a tilongo betanga ki, yesoo kanakana ngan iyei gogo so alunu ye bar ki tina ngan a tikamata ye matadi le nga titakrai ye. 12Bong yeisa be kene yo Pilip la iwetewete pang di ye bingi dook mata ke dada yo Maro be matan kala di tooltool ki ye i, inbe ye Yesu Kirisi tani in ene nga, ngan le di tooltool le imot, tamoto le garup, tiportak lodi pang Maro, inbe Pilip irriu di. 13Ngan le Simon tani in ya taunu itara lono medana pang Yesu, le Pilip irriu lapau. Motong la itoo Pilip ye ni mai i le imot yo ipa pang ye nga, inbe ikamata mos maimai matana matana yo Pilip iyei a iyei ben tarkilanga panga nga, ngan le itakrai ye.

14Ye kene tani in di aposol ke Yesu yo tiyepe Yerusalem nga, ngan tilongo betanga be di tooltool ke Samaria ngan titara lodi medana ye betanga ke Maro oo. Motong la tiwanga Pita iye Yowan a tila pang ye di. 15Le nga Pita iye Yowan tina ngan tipa a du pombe, motong la yaru tipatarau pang Maro be ikaua Amunu Silene pang di tooltool ke Samaria nga, 16yesoo Maro Amunu Silene isi ye di tiao. Ngan di tooltool yo du tirriu di muku nga, ngan tirriu di ye Tool Mai Yesu ene leu. 17Le nga Pita iye Yowan tina tipatarau a imot, motong la yaru titar baedi lo ye di tooltool tina ngan podi, le taun tikaua Maro Amunu Silene.

18Ye kene tani in Simon, yo pidipidana i, in iyepe lapau, le ikamata di aposol ru ke Yesu tina yo tipaloko baedi lo ye di tooltool tina ngan podi, ngan le tikaua Maro Amunu Silene nga. Le nga ikap pat ke yimoongoo so a ila be la ikap pang di yaru, inbe iyei ne, 19“Au i lok be angru kakaua gurana in pau lapau, a nen be apaloko baek lo ye tool atu pono nga, ngan ole ikaua Maro Amunu Silene.”

20Motong la Pita iwete panga nen, “Ona, ong i, ole Maro igarungong le kupa ye pat kiong nga le kulem, yesoo so yo be Maro ya taunu ikauu ye lo ponana ki i, in lom tar be ole kuyimoo ye pat. 21Ong i lom iken dook mata ye Maro matana tiap. Ngan nen le ke be se kuyei emam be amyong tayei urata ke Maro yo am amyeii, in tiap. 22Le kuportaka lom, inbe kuwala murim pang dada dook tiap yo nen nga. Inbe kupatarau pang Tool Mai a kutoru, a nen ngan be lono dook mata nga, ngan igiri dada dook tiap yo iken lom nga. 23Ngan au i awete nen nga, yesoo bong akamatong, ngan ong i matam gorengana mata ye so yo Maro ikauu pam i, inbe noonoo kiong iparamong le ke be kuyege tiap.”

24Pita iwete panga nen a imot, motong la Simon tani in iyei ne, “Atoo, be nen ngan angru kapatarau pang Tool Mai yau, a nen ngan so yo angru kawete pau ye nga, ngan o ke be pombe pang yau tiap.”

25Ngan Pita ye Yowan tina tikaua bingi pang di tooltool ye so yo Tool Mai iyei pang di yaru nga, inbe tiwetewete pang di ye betanga ke Maro a imot, motong la yaru timulu a tilo pang Yerusalem. Ngan ye kene yo yaru tipa a be timulu a tilo ye in nga, ngan le yaru tiwetewete bingi dook mata pang di tooltool ke malala kakase alunu yo ke Samaria nga.

Pilip Iwete Bingi Dook Mata Pang Tool Atu Ke Itiopia

26Di suru tina ngan tilo, motong la bangabangana ke Tool Mai atu isi le si iwete pang Pilip nen, “Ai, kumadit a kupa nen a kula pang ye dada yo ipa ke Yerusalem a idu pang ye malala mai Gasa i.” (Ngan dada tani in iken ye ni sorrakene.)

27Motong la Pilip imadit tina ngan le ipa a itoo dada tani in a idu, ngan le du ipuske tool atu ke Itiopia yo tinin mata i.+ Ngan tool tani in titaru a iyei tool mai a matan kala depe ke pat ke Kandasi, garup yo iyei kuto mai a matan kala di tooltool ke Itiopia le imot i. Ya in ilo Yerusalem lo isung a imot, 28motong la be imulu a idu pang malala ki. Le nga tool tani in iwur ye koror ki ke burungu yo asara tiyole i, inbe nga ikinkata rau ke Maro koonoo yo Esai i, in a idu. 29Motong la Maro Amunu Silene iwete pang Pilip tani nen, “Kupa le kudu potai ye koror ke burungu ni.”

30Motong la Pilip idada le idu potai ye koror tani, ngan ilongo tool tani yo ikinkatkata rau ke Maro koonoo yo Esai in nga. Le nga Pilip itoru nen, “Ai, ong i lom galanga ye betanga yo kukinkati i, in punu lapau, too tiap?”

31Ngan tool tani iyei ne, “Kumata be tool sa iwete nini betanga i punu pau tiap nga, ngan ole lok galanga ye belei?” Motong la iwete pang Pilip be irookoo a ilo lo iwur gigini.

32Ngan betanga tani yo iken ye rau ke Maro koonoo a tool tinin mata tani in ikinkati i, in iwete nen:

“Ya in iwete touo betanga siap.

Ya in koom pakom dawa ben sipsip yo tirara be la tiraumate i,

inbe taukan koonoo ben sipsip natunu yo tikauu be la tikot bulbulini i.

33Ngan ya in tikan paseme,

inbe ye kene yo lo ikodo dama ke di tooltool maimai ke karatanga betanga ye i,

ngan le tikarata betanga ki dook tiap.

Ngan nen le di tooltool ke be tipit di sasa ki tiap,

yesoo ya in tiraumate a imata le yepongo ki ke tana i, in imot oo.”+

34Ngan tool tani yo tinin mata i, in ikinkata betanga tani a imot, motong la itoro Pilip nen, “Kuwete pau ngan, sei tool Maro koonoo i iwetewete ye nen i? Ngan iwete nen ye ya taunu, too ye tool san mulu?” 35Motong la Pilip imadit be iwete nini betanga tani in pang tool tani nga, ngan le iwetewete panga a ipagalanga lono ye betanga tani yo ikinkati i, in punu ye bingi dook mata ke Yesu.

36-37Ngan Pilip iye tool tani in yaru titoo dada a tidu le du yaru pombe ye ran pattu. Motong la tool tinin mata tani in iwete pang Pilip nen, “Kumata, ran pattu me e nga. E nga yelei a le be kurriu au tiap nga?”+

38Le nga tool tani in iwete pang tool yo be ipamak di asara yo tiyolo koror tani i, in be iwete pang di asara tina a be tikodo. Motong la Pilip ye tool tinin mata tani in yaru tipas a tidu ran lono du Pilip irriuu. 39Pilip irriuu a imot, motong la ye kene yo be yaru tipa ke ran lono a tise nga, ngan le pattu leu, inbe Tool Mai Amunu isi ikaua Pilip a ila, le tool tani in ikamata Pilip mulu tiap. Bong tool tani, in lon ponana welewele, inbe itoo dada a imulu a idu pang ni ki. 40Ngan le Pilip tani in ikamata ngan Maro Amunu Silene ikauu a ila nga, ngan le la pombe ye malala mai Asdot. Motong la ipa a ila ye malala maimai kapala la iwetewete bingi dook mata ke Yesu pang di tooltool le la pombe ye malala mai Sisaria.

Rau Ke Maro

© Wycliffe Bible Translators, Inc. All rights reserved

More Info | Version Index