Vyhľadávací formulár

BILANGEN 31

Perang ngelawan bangsa Midian

1Nina TUHAN man Musa, 2“Ukumlah bangsa Midian erkite-kiteken kai si enggo ibahanna man bangsa Israel. Kenca ibahanndu e, mate kam.”

3E maka ikataken Musa man bangsa Israel nina, “Ersikaplah guna erperang, gelah banci iperangndu bangsa Midian lako ngukum ia erkite-kiteken kai si enggo ibahanna man TUHAN. 4I bas tep-tep suku Israel nari suruhlah seribu kalak dilaki erperang.”

5E maka ipilih me seribu kalak i bas tep-tep suku nari, janah jumlahna kerina sepuluh dua ribu kalak sikap guna erperang. 6Isuruh Musa ia kerina erperang ipinpin Pinehas anak Imam Eleasar, si ertugas ngurus barang-barang si badia ras terompet-terompet guna mereken tanda. 7Sue ras si iperentahken TUHAN man Musa, iserangna bangsa Midian, ibunuhna kerina dilaki, 8subuk lima kalak raja-raja Midian, e me: Epi, Rekem, Sur, Hur, ras Reba. Bilham anak Beor pe ibunuhna. 9Itaban bangsa Israel diberu-diberu bangsa Midian bage pe anak-anak, ibuatna lembuna ras biri-birina, irampasna kerina erta-ertana, 10janah icilukna kerina kuta-kutana ras inganna erkemah. 11Ibuatna kerina barang-barang rampasen si enggo idatca e, subuk kalak si enggo itaban ras asuh-asuhen, 12jenari ibabana man Musa ras Eleasar bage pe man perpulungen bangsa Israel, si sangana i bas ingan erkemah i bas kendit Moap, i kepar-kepar Lau Jordan petingtang ras Jeriho.

Mulih tentera ndai

13Musa, Eleasar, ras kerina peminpin-peminpin perpulungen e si deban lawes ndarat i bas ingan erkemah e nari ngalo-ngalo tentera e. 14Irawai Musa panglima-panglima tentera e -- panglima-panglima seribu, panglima-panglima seratus -- si enggo mulih i bas peperangen e nari. 15Isungkunina ia kerina nina, “Engkai maka ipelepasndu kerina diberu-diberu e nggeluh? 16Inget maka diberu-diberu e nge si enggo iajar-ajari Bilham janah mabai bangsa enda lanai setia man TUHAN i Peor. E me si enggo maba penakit si ngkenai nterem jelma i bas bangsa TUHAN. 17E maka genduari bunuhlah tep-tep anak dilaki ras diberu si enggo ersada kula. 18Tapi pelepaslah nggeluh man sikerajangenndu kerina anak diberu ras kerina diberu-diberu si langa pernah ersada kula. 19Genduari kerina kam si enggo munuh ntah pe si enggo ndadap mait arus tading i darat ingan erkemah pitu wari dekahna. I bas wari si peteluken ras pepituken bersihkenlah man bandu ras diberu-diberu si enggo itabanndu e. 20Bersihkenlah kerina paken ras barang-barang si ibahan i bas kulit, mbulu kambing ras i bas kayu nari.”

21Ikataken Eleasar man kerina dilaki si enggo mulih i bas peperangen nari, “Enda me peraturen-peraturen si enggo ibereken TUHAN man Musa. 22-23Tep-tep barang si la banci meseng, umpamana emas, pirak, tembaga, besi, timah-putih, ras timah-hitam, arus ibersihken arah api. Tapi barang si deban arus ibersihken alu lau pemurihi. 24I bas wari si pepituken la banci la icucindu uisndu; kenca bage e maka kam enggo bersih rikutken peraturen agama jenari enggo banci kam bengket ku bas ingan erkemah e.”

Pembagin barang rampasen

25Nina TUHAN man Musa, 26“Kam ras Eleasar bage pe ras peminpin-peminpin perpulungen e si deban, arus ngkira kerina si enggo itaban, ikut pe manusia ras asuh-asuhen. 27Bagiken kai si enggo ibuat e jadi dua bagin si seri, sada bagin man tentera e janah sada bagin man kerina perpulungen. 28I bas bagin sikerajangen tentera e nari buatlah jadi cuke man TUHAN sada i bas tep-tep lima ratus manusia tabanen janah bage ka pe bagin si man buaten i bas lembu, kelede, biri-biri, ras kambing. 29Berekenlah si e kerina man Imam Eleasar jadi sada pemere khusus man TUHAN. 30I bas bagin si ibereken man perpulungen e, buatlah sada i bas tep-tep lima puluh manusia tabanen nari janah bage ka pe bagin si man buaten i bas lembu, kelede, biri-biri, ras kambing. Berekenlah e man kalak Lewi si ertugas ngurus Kemah TUHAN.” 31Iikutken Musa ras Eleasar kai si ipedahken TUHAN man bana.

32-35Si tersurat arah teruh enda e me kap surat rampasen si itaban tentera-tentera e, tambah-tambah kai si ibuatna man sikerajangenna: 675.000 biri-biri ras kambing, 72.000 lembu, 61.000 kelede, ras 32.000 singuda-nguda. 36-40Si setengah jadi sikerajangen tentera e, e me 337.500 biri-biri ras kambing, janah beligai si jadi sikerajangen TUHAN e me 675; 36.000 lembu man tentera e, i bas si e nari pitu puluh dua man TUHAN; 30.500 kelede man tentera e, i bas si e nari enem puluh sada man TUHAN; 16.000 singuda-nguda man tentera e, i bas si e nari telu puluh dua man TUHAN. 41E maka ibereken Musa man Eleasar cuke e jadi sada pemere khusus man TUHAN, bagi si enggo ipedahken TUHAN.

42-46Bagin sikerajangen perpulungen e bali ras si man tentera e: 337.500 biri-biri ras kambing, 36.000 lembu, 30.500 kelede, ras 16.000 singuda-nguda. 47I bas bagin enda nari ibuat Musa sada i bas tep-tep lima puluh manusia tabanen ras asuh-asuhen, janah bagi si enggo ipedahken TUHAN, iberekenna si e kerina man kalak Lewi si ertugas ngurus Kemah TUHAN.

48Kenca bage komendan-komendan si enggo minpin tentera e lawes ndahi Musa. 49Ngelapor ia nina, “O bapa, kerina tentera si ipinpin kami enggo ikira kami, janah sada pe la lit bene. 50E maka ibaba kami perhiasen-perhiasen emas, gelang nahe, gelang tan, cincin, anting-anting, ras bura si idat kami sekalak-sekalak. Si enda kerina ipersembahken kami man TUHAN jadi tebus kesah kami, gelah kami tetap ikawaliNa.” 51Musa ras Eleasar ngaloken emas e, si kerina i bas bentuk perhiasen. 52Jumlah berat pemere komendan-komendan e menam dua ratus kilo. 53Kalak si labo komendan, barang rampasen si idatna isimpanna saja man sikerajangenna. 54E maka ibaba Musa ras Eleasar emas e ku bas Kemah e, gelah ikawali TUHAN bangsa Israel.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index