Vyhľadávací formulár

Sir 31

1Nafolo be na ni hami minw ye, o ye:

O be sinɔgɔbaliya bila mɔgɔ la,

sinɔgɔbaliya do be mɔgɔ nagasi.

2Dumuniko hami fana be mɔgɔ bali sinɔgɔ ma,

i ko banajugu be mɔgɔ bali sinɔgɔ ma cogo min na.

3Nafolotigi kɔni b'a la ka nafolo ɲini dɔrɔn,

n'a ko a be lafiɲɛ,

o ye a ka nisɔndiya waati ye.

4Fantan be sigɛn,

o n'a ta bɛɛ, a t'a ka balo sɔrɔ.

N'a ko a be lafiɲɛ,

o be kɛ makari daan ye.

5Sanu koo ka di mɔgɔ min ye,

o tigi tena to tilenninya la.

Mɔgɔ min b'a ka tɔnɔ dama ɲinina,

o tigi bena siraɲuman bila.

6Mɔgɔ caaman halakira sanu sababu la,

u ta cɛnna ten.

7Sanu kɛra jaan ye naloman fɛ,

a be kolɔnbaliw bɛɛ minɛ.

8Mɔgɔ min y'a ka nafolo sɔrɔ ni jalakiyɔrɔ t'a la,

n'a fana m'a ka nafolo sɔrɔ ni sanu ɲini sira ye,

o tigi dagamunin lo.

9O tigi ye jɔn ye?

A ka kan ni tanuli ye.

Bari, a y'a yɛrɛ minɛ ka ɲa jama cɛma.

10Mɔgɔ be se k'o koo ɲɔgɔn muɲu fɔɔ a laban wa?

O kɛbaga be se k'a yɛrɛ boɲa.

Mɔgɔ damani le be se ka ban ka sariya cɛn,

walima a be se ka kojugumin kɛ,

a b'o ye k'a to yen.

11A ka hɛrɛ bena barika sɔrɔ kosɔbɛ.

A ye baaraɲuman minw kɛ,

jama bena olu fɔ.

Dumuni

12N'i tagara dumunikɛyɔrɔ mɔgɔbaba fɛ,

kana taga sigi k'i daa waga,

ka to k'a fɔ ko:

«Ee, a ka di dɛ!»

13I hakili to a la ko k'i ɲaa bɔ mɔgɔ ka fɛɛn na,

o ye kojugu ye.

Ɲajuguya le ye fɛɛn bɛɛ la juguman ye,

o la, cogo caaman,

a be sababu sɔrɔ k'a ɲaji bɔ.

14E ɲaa bɔra fɛɛn min bɛɛ fɛ,

kan'i bolo sama o kama,

n'o tɛ, e bolo n'i tɔɲɔgɔn ta bena ɲɔgɔn kunbɛn tasa kɔnɔ.

15E tɔɲɔgɔn mako be min na, e k'o jati minɛ.

E ka miiri fɔlɔ i ka kɛtaw la.

16E yɛrɛ minɛ i ko mɔgɔ min kolola ka ɲa,

kan'a kɛ u be tigɛ i la e ka nugubatɔya kama.

17I k'a yira ko e kolola ka ɲa, e ka kɔn ka wili,

kan'a yira ko e te fa joona

janko mɔgɔ wɛrɛ hakili kana ɲagami.

18N'aw ka ca dumuni kunna,

i kana kɔn k'a tigɛ tɔw ɲa.

19Mɔgɔ min kolocogo ɲana,

koo dɔɔni na, a be wasa.

O la, n'a lara tuma min na,

a te tɔɔrɔ a kɔnɔbara fɛ.

20Mɔgɔ min be dumuni kɛ ka kɛɲɛ,

o tigi be sinɔgɔ ka ɲa.

A be wili sɔgɔma joona, a ka kɛnɛ.

Nga sinɔgɔbaliya ni fɔɔnɔ,

ani kɔnɔdimi le ye nugubatɔ ta ye.

21N'i wajibiyara ka dumuni kɛ kojugu,

e ka taga fɔɔnɔ,

o ben'a nɔgɔya i ma.

22Ne deen, mɛnni kɛ ne fɛ,

kana ban n ka fɔta la.

Kɔfɛ, i bena ne ka kuma faamu.

I bena min bɛɛ kɛ,

i k'o kɛ ni hakilitigiya ye,

o la, e bena se ka kisi bana bɛɛ ma.

23Ni mɔgɔ min be koɲuman kɛ,

mɔgɔ bɛɛ le b'a tanu,

a ka ɲumanya be ye yɛrɛ yɛrɛ le.

24Ni mɔgɔ dɔ be sɔnjuguya kɛ a ka dumuni na,

dugumɔgɔw bɛɛ le b'a koo fɔ ko:

«A ka tigɛgwɛlɛya lara kɛnɛ kan sɔbɛ sɔbɛ la.»

Duvɛn

25Kan'a fɔ ko i ye barikatigi ye

ka tolon kɛ duvɛn na,

bari duvɛn ye mɔgɔ caaman ta cɛn.

26Numucɛ ka tasuma fariya be nigɛ kɛ cogo min na,

o cogo kelen na,

duvɛn be yɛrɛboɲalaw dusu gwan

u ka kɛlɛ waati la.

27Duvɛn kɛra adamaden ka ɲanamanya taamasiɲɛ ye,

n'i b'a min k'a kɛɲɛ.

Adamaden be ɲanamanya cogo di n'a ma duvɛn min?

Ala ye duvɛn dan diɲɛ daminɛ na,

janko ka adamaden nisɔndiya.

28N'i ye duvɛn min a minwaati n'a mincogo la,

a be dusudiya ni nisɔndiya di mɔgɔ ma.

29Nga n'i y'a min k'a dama tɛmɛ,

a b'i nisɔn goya,

a be mɔgɔ ɲɔti k'i bila talontalon na.

30Dɔrɔtɔya be naloman ka fariya juguya a yɛrɛ cɛn kama,

a be dɔ bɔ a barika la,

a ka kan ni bugɔli ye.

31N'i tagara dumuniba kɛyɔrɔ la,

duvɛn diman be min na,

i yɛrɛ kɔlɔsi, kana i sigiɲɔgɔn jalaki.

N'a be nisɔndiyara, kan'a dɔgɔya,

kana kuma fɔ a ye min b'a dimi,

kana e ka juru kani a fɛ o yɔrɔ la.

ALA KA KUMA

© 2008 Alliance Biblique du Burkina Faso

More Info | Version Index