Vyhľadávací formulár

Sir 33

1Mɔgɔ min be siran Matigi ɲa,

o tigi be kisi bɔnɛ ma.

Ni kɔrɔbɔli waati sera, a be bɔ o la.

2Kolɔnbaga te dimi sariya batoko la.

Nga a cɛnbaga be i ko kurun,

sanfɔɲɔba cɛma jii kan.

3Hakilitigi b'a jigi la Ala ka kuma kan,

Ala ka sariya ni sarakalasebaga ka kirayakuma ye kelen ye ale fɛ.

Nalomanya ani mɔgɔlɔgɔbɔbaga

4N'i b'a fɛ mɔgɔ k'i lamɛn,

kɔn k'i ka fɔta labɛn.

I ka lɔnta fara ɲɔgɔn kan,

o kɔ, i ka jaabili kɛ.

5Naloman ka koo yecogo be i ko wotoro seen,

a ka kumacogo be i ko wotoro seen

min be munumunu.

6Mɔgɔlɔgɔbɔteri be i ko

soo min be ŋunan a yɛlɛbagaw bɛɛ kɔrɔ.

Kotilenbaliw

7Mun na loon dɔ ka fisa ni dɔ ye?

K'a sɔrɔ saan loonw bɛɛ be yeelen sɔrɔ tile le barika la.

8Matigi le y'u danfara bɔ ten.

Ale lo ye saan tilan,

ani ka ɲanagwɛ waatiw sigi.

9A ye dɔw boɲa k'u kɛ loon senumanw ye,

ka dɔw fana labila ten k'u kɛ loon gwansanw ye.

10Adamadenw bɛɛ bɔra bɔgɔ la,

i ko Adama danna ka bɔ a la cogo min na.

11O bɛɛ n'a ta,

ka Ala to a ka lɔnniyaba la,

a ye danfara bɔ u la,

bɛɛ n'u dankan danna danna.

12A ye barika don dɔw la,

ka lɔyɔrɔɲumanw di u ma.

A ye dɔw kɛ a ta ye,

olu ka gwɛrɛ a la.

Nga a ye dɔw ta cɛn k'u majigi tɛtɛtɛ,

k'u bɔ u ka lɔyɔrɔw la.

13Dagadilanbaga b'a ka bɔgɔmana yɛlɛma

a sago la cogo min na,

adamadenw be ten u Danbaga bolo.

Ale lo bena u sara ka kɛɲɛ n'a ka kiti ye.

14Koɲuman be yɔrɔ min na,

kojugu fana be sɔrɔ yen.

Ɲanamanya be yɔrɔ min na,

saya fana be o yɔrɔ la.

O cogo la fana, n'i ye kojugukɛla ye yɔrɔ min na,

Alaɲasiranbaga be yen fana.

15Fɛɛn bɛɛ kuntigi ka danfɛnw bɛɛ jati minɛ sa,

u bɛɛ be ta ɲɔgɔn fɛ fila fila,

hali n'u te bɛɛn ɲɔgɔn ma.

Sɛbɛnnikɛla be miiri a ka baarala

16Ne nana kɔfɛ ka n ta kɛ,

i ko fɛfɛrikɛbaga b'a kɛ cogo min na *ɛrɛzɛnforo kɔnɔ

ɛrɛzɛn tigɛbaga kɔfɛ.

17Matigi barika la, ne sera ka n ta kɛ,

n sera ka n ka minan fa i ko fɛfɛrikɛbaga.

18Aw k'a faamu kosɔbɛ ko ne ma sigɛn n yɛrɛ dama kosɔn,

n sigɛnna ladiliɲinibagaw bɛɛ le kosɔn.

Yɛrɛminɛcogo

19Jamana ɲamɔgɔw, aw ka mɛnni kɛ!

Jamana kuntigiw, aw k'aw tulo malɔ!

20K'i to sii la, kana sɔn k'i deen, walima i muso,

walima i balima,

walima i teri kɛ i kuntigi ye.

Kana i ka nafolo fana di mɔgɔ wɛrɛ ma,

janko i kana nimisa k'a fɔ ko i b'a minɛ tugu.

21K'i to sii la n'i be ninakili kɔni,

kana sɔn mɔgɔ wɛrɛ ka kɛ i kuntigi ye.

22I deen makoya ka bɔ ele la,

o ka fisa,

ele ka to ka minɛni kɛ ale fɛ.

23I ka kɛtaw bɛɛ la,

i ka banba k'i yɛrɛ minɛ.

Kan'a to i tɔgɔ ka cɛn.

24N'i ser'i sii daan ma tuma min na,

n'i satuma sera,

i be sɔrɔ k'i cɛɛn tilan a tabagaw cɛ.

Jɔɔnw minɛcogo

25Fali ta ye biin ni busan,

ani doni gwiliman le ye,

jɔɔn ta ye dumuni,

ani jalakili, ni baara ye.

26N'i ye baara di jɔɔn ma,

e be hɛrɛ sɔrɔ.

N'i y'a to a sago la,

a bena boliyɔrɔ ɲini.

27Sɛnɛkɛlɔgɔ min be misi kaan na,

o le b'a sumaya.

Bugɔlibere le be jɔnjugu sumaya.

28Baara d'i ka jɔɔn ma,

janko a kana sigi gwansan.

29Bari, baarakɛbaliya be na ni kojugu caaman ye.

30O la do, baara d'a ma,

bari o le y'a nakun ye.

N'a banna, e k'a seen siri ni jɔrɔkɔ ye.

Nga mɔgɔ te se ka min kɛ,

e kana o ɲini a fɛ.

E ka koo bɛɛ kɛ ni tilenninya ye.

31Ni jɔɔn kelen le b'i fɛ,

i k'a minɛ i ko i yɛrɛ,

bari i y'a sɔrɔ n'i wasiji lo ye.

N'a kelen lo, i k'a minɛ i ko i balima,

bari e makoya b'a la i ko i mako b'i yɛrɛ la cogo min na.

32N'i y'a minɛcogo juguya,

n'a bolila,

33i ben'a ɲini ni sira jumɛn ye tugu?

ALA KA KUMA

© 2008 Alliance Biblique du Burkina Faso

More Info | Version Index